En tiu ĉi volumo aperas la kontribuaĵoj de kolegoj kaj amikoj de D-ro Ulrich Lins okaze de lia 75-a datreveno. Okupiĝante pri la akademia interŝanĝo inter Germanio kaj aliaj landoj kaj laborante en Tokio sume ĉirkaŭ dek jarojn, D-ro Lins aktivadis en sia profesia kariero interalie por ligi la Okcidenton kaj la Orienton. Kun doktoreco en moderna historio, li estas sendube la plej elstara figuro en la esplorado de la historio de la Esperanto-movado. Lia ĉefverko, La Danĝera Lingvo, aperis en pluraj versioj foje kun funda reverkado de la teksto kaj estis tradukita en nombro da naciaj lingvoj. Per ĉi tiu volumo la aŭtoroj de la kontribuaĵoj kaj la redaktoroj deziras esprimi sinceran dankon al la jubileulo pro ĉio, kion li faris dum pli ol kvar jardekoj. La volumon enkondukas studo pri la vivo kaj verko de Ulrich Lins. La pos­taj ĉapi­troj estas ordigitaj en kvar par­toj, kiuj spe­gu­las la interesojn de la dediĉ­ito de tiu ĉi volumo. Parto I entenas ĝene­ralajn eseojn kaj historiajn studojn inspi­r­itajn de aŭ rilatajn al la temo de lia ĉef­verko, "La Danĝera Lingvo". La kontribuaĵoj en partoj II kaj III prilumas la vivon kaj agon de esperantistoj kaj diver­sajn aspektojn de (mikro)historiaj procezoj en kaj ekster la Esperanto-movado. En parto IV troviĝas eseoj, kiuj prezentas kaj diskutas ideojn kaj praktikojn, unue pri Esperanto kaj sekve pri aliaj lingvoj kaj lingvoprojektoj. Laste situas bibliografio de la jubileulo kaj indekso de personaj nomoj.